Published On: Fri, Jul 19th, 2019

ఈ నెల 21న తిరుమల పెద్దజీయర్‌స్వామి చతుర్మాస దీక్ష

సెల్ఐటి న్యూస్‌, తిరుమ‌ల‌: ఈ నెల 21న తిరుమలలో పెద్దజీయర్‌స్వామి చతుర్మాస దీక్ష ప్రారంభించనున్నారు. ఇందులో భాగంగా ఆదివారం ఉదయం దీక్ష సంకల్పం శాస్త్రోక్తంగా నిర్వహించనున్నారు. ఆషాడ శుద్ధ ఏకాదశి రోజున శ్రీమహావిష్ణువు యోగ నిద్రలోకి వెళ్ళి తిరిగి కార్తీక శుద్ధ ఏకాదశి రోజున మేల్కొంటారు. కావున ఈ నాలుగు నెలల కాలాన్ని చాతుర్మాస్యం అంటారు. చాతుర్మాస వ్రతం ప్రాచీనకాలం నుండి ఆచరణలో ఉన్నట్లు పురాణాల ద్వారా తెలుస్తుంది. హైందవ సనాతన వైదిక ధర్మంలో ఈ చాతుర్మాస దీక్షలకు ఎంతో ప్రాముఖ్యత ఉంది. శ్రావణ, భాద్రపద, ఆశ్వయుజ, కార్తీక పవిత్ర మాసాలలో ఆచార్య పురుషులు స్నాన, జప, హోమ, వ్రత, దానాదులను లోక కల్యాణార్థం నిర్వహించడం ఆనవాయితీ.ఈ నేపథ్యంలో రామానుజాచార్యులవారి వంశపారంపర్య ఆచారంలో భాగంగా వ్యాస పూర్ణిమ మరునాడు నుండి ఈ చాతుర్మాస దీక్ష సంకల్పాన్ని చేయడం విశేషమైనదిగా భావిస్తారు. ఈ సందర్భంగా పెద్దజీయర్‌స్వామికి పెద్దమర్యాద చేస్తారు. తిరుమల క్షేత్ర సాంప్రదాయాన్ని పాటిస్తూ ముందుగా పెద్దజీయర్‌స్వామి తిరుమల బేడి ఆంజనేయ స్వామివారి ఆలయం ప్రక్కన ఉన్న జీయంగారి మఠం వద్ద నుండి చిన్నజీయంగారు మరియు ఇతర శిష్య బృందంతో కూడి ముందుగా శ్రీవరాహస్వామివారి ఆలయాన్ని, స్వామి పుష్కరిణిని సందర్శించి అనంతరం శ్రీవారి ఆలయానికి విచ్చేస్తారు. శ్రీవారి ఆలయ మహాద్వారం చెంత టిటిడి కార్యనిర్వహణాధికారి, ఇతర ఆలయ అధికారులతో కలిసి మర్యాదపూర్వకంగా వారిని ఆహ్వానిస్తారు. జీయంగార్లు శ్రీవారిని దర్శించుకున్న తరువాత రంగనాయకుల మండపంలో తిరుమల పెద్దజీయంగారికి మేల్‌చాట్‌ వస్త్రాన్ని, చిన్న జీయంగారికి  నూల్‌ చాట్‌ వస్త్రాన్ని బహుకరిస్తారు. ఈ కార్యక్రమంలో టిటిడి అధికార ప్రముఖులు పాల్గొంటారు.

Just In...