Published On: Thu, May 21st, 2020

సీఎంతో చ‌ర్చించి చిత్ర ప‌రిశ్ర‌మను గ‌ట్టెక్కిస్తాం…

* లాక్‌డౌన్‌తో తీవ్ర ఇబ్బందులు ప‌డుతున్న చిత్ర ప‌రిశ్ర‌మ ‌స‌మ‌స్య‌ల ప‌రిష్కారానికి కృషి…

* సినీ న‌టుల‌కు మంత్రి త‌ల‌సాని శ్రీనివాస్ యాద‌వ్ హామీ

* మెగాస్టార్ చిరంజీవి ఇంట్లో ప‌లువురు సినీ న‌టులు, ద‌ర్శ‌కులు, నిర్మాత‌లు భేటీ

జూబ్లీహిల్స్‌, సెల్ఐటి న్యూస్‌: కరోనా వ్యాప్తి నియంత్రణ కోసం అమలు చేస్తున్న లాక్‌డౌన్‌తో తీవ్ర ఇబ్బందులు ఎదుర్కొంటున్న తెలుగు చలన చిత్ర పరిశ్రమ సమస్యలను ముఖ్యమంత్రి కల్వకుంట్ల చంద్రశేఖర్‌రావు దృష్టికి తీసుకెళ్ళి వాటి పరిష్కారానికి కృషి చేస్తానని  పశుసంవర్ధక, మత్స్య, సినిమాటోగ్రఫీ శాఖల మంత్రి తలసాని శ్రీనివాస్ యాదవ్ సినీ ప్రముఖులకు హామీ ఇచ్చారు. గురువారం జూబ్లీహిల్స్‌లోని ప్రముఖ సినీనటుడు, పద్మభూషణ్ చిరంజీవి నివాసంలో చలనచిత్ర పరిశ్రమకు చెందిన ప‌లువురు ప్రముఖులతో నిర్వహించిన సమావేశంలో ఆయన మాట్లాడారు. పరిశ్రమలోని 14 వేల మంది కార్మికులకు తన సొంత నిధులతో నిత్యావసర సరుకులను అందజేస్తానని మంత్రి ఈ సందర్భంగా ప్రకటించారు. ఈ సమావేశంలో పలువురు నిర్మాతలు, దర్శకులు మాట్లాడుతూ లాక్‌డౌన్ కారణంగా సినిమా షూటింగ్‌లు నిలిచిపోయి ప్రత్యక్షంగా, పరోక్షంగా ఈ పరిశ్రమపై ఆధారపడి జీవనం సాగిస్తున్న లక్షలాది మంది ఉపాధి లేక అనేక ఇబ్బందులు పడుతున్నారని వివరించారు. అందరి సంక్షేమాన్ని దృష్టిలో ఉంచుకొనే షూటింగ్‌లను నిలిపివేయడం జరిగిందన్నారు. ఈ రంగంపై ఆధారపడి జీవిస్తున్న పరిశ్రమలోని 14 వేల మందికి కరోనా క్రైసిస్ చారిటీ ద్వారా నిత్యావసర వస్తువులు పంపిణీ చేయడం జరిగిందని తెలిపారు. పరిశ్రమలోని అన్ని వర్గాల వారు ఎదుర్కొంటున్న సమస్యలను దృష్టిలో ఉంచుకొని సినిమా ప్రొడక్షన్,  పోస్ట్ ప్రొడక్షన్ నిర్వహించుకునేందుకు, సినిమా దియేటర్ల‌ను తెరిచేందుకు ప్రభుత్వం అనుమతించాలని కోరారు. లాక్‌డౌన్ సమయంలో షూటింగ్‌లలో ఎలాంటి జాగ్రత్తలు తీసుకుంటామో వివరిస్తూ అవుట్ డోర్, ఇండోర్ షూటింగ్‌లకు సంబంధించిన మాక్ వీడియోను ప్రభుత్వానికి సమర్పిస్తామని మంత్రి శ్రీనివాస్ యాదవ్‌కు వివరించారు. స్పందించిన మంత్రి శ్రీనివాస్ యాదవ్ మాట్లాడుతూ తెలంగాణ ప్రభుత్వం తెలుగు చలనచిత్ర పరిశ్రమ పట్ల ఎప్పుడు సానుకూల‌ ధోరణితో ఉంటుందని చెప్పారు. దేశంలోనే హైదరాబాద్ నగరం చిత్రరంగానికి హబ్‌గా నిలిచిందని అన్నారు. పోస్ట్ ప్రొడక్షన్ చేసుకునేందుకు అనుమతించే విధంగా సంబంధిత అధికారులకు ఆదేశాలు జారీ చేయడం జరిగిందని తెలిపారు. తప్పనిసరిగా ప్రభుత్వ ఆదేశాల ప్రకారం మాస్క్‌లు ధరించాలని, శానిటైజేషన్ వినియోగించాలని, ‌ బౌతికదూరం పాటించేలా జాగ్రత్తలు తీసుకోవాలని చెప్పారు. మాక్ షూటింగ్ నిర్వహణకు అవసరమైన సహకారం అందిస్తామని మంత్రి తెలిపారు. షూటింగ్‌ల నిర్వహణకు, దియేటర్‌లను తెరిచేందుకు సీఎంతో చర్చించి నిర్ణయం తీసుకుంటామన్నారు. ఈ సమావేశంలో పద్మభూషణ్ చిరంజీవి, సీనియర్ నటులు అక్కినేని నాగార్జున, నిర్మాతలు అల్లు అరవింద్, సి.కళ్యాణ్, దిల్‌రాజు, శ్యాం ప్రసాద్ రెడ్డి, జెమిని కిరణ్, దర్శకులు వి.వి.వినాయక్, త్రివిక్రమ్ శ్రీనివాస్, కొరటాల శివ, ఎన్‌.శంకర్,ఎఫ్‌డీసీ మాజీ చైర్మన్ రాంమోహన్‌రావు త‌దిత‌రులు పాల్గొన్నారు.

Just In...