Published On: Sat, Oct 17th, 2020

హంస వాహ‌నంపై స‌ర‌స్వ‌తి అలంకారంలో మలయప్ప స్వామి

తిరుమ‌ల, సెల్ఐటి న్యూస్‌‌: శ్రీవారి న‌వ‌రాత్రి బ్రహ్మోత్సవాల్లో రెండో రోజైన శ‌నివారం రాత్రి శ్రీ‌వారి ఆల‌యంలోని క‌ల్యాణ మండ‌పంలో మలయప్ప స్వామి వారు హంస వాహనంపై వీణ ధ‌రించి స‌ర‌స్వ‌తి దేవి అలంకారంలో దర్శనమిచ్చారు. హంస వాహనం – బ్రహ్మ పద ప్రాప్తి. హంస వాహన సేవలో మలయప్ప స్వామి వారు జ్ఞానమూర్తిగా ప్రకాశిస్తాడు. ఐతిహ్యానుసారం బ్రహ్మ వాహనమైన హంస జ్ఞానానికి ప్రతీక. పాలను, నీళ్లను వేరుచేసే విచక్షణ దీని స్వభావం. ఇది ఆత్మానాత్మ వివేకానికి సూచకం. అందుకే ఉపనిషత్తులు పరమాత్మతో సంయోగం చెందిన మహనీయులను పరమహంసగా అభివర్ణిస్తున్నాయి. శ్రీవారు భక్తులలో అహంభావాన్ని తొలగించి జ్ఞానసిద్ధి, బ్ర‌హ్మ‌ప‌ద ప్రాప్తి కలిగించేందుకే హంస వాహనాన్ని అధిరోహిస్తాడని పురాణాలు ఘోషిస్తున్నాయి. ఈ కార్య‌క్ర‌మంలో పెద్ద‌జీయ‌ర్‌స్వామి, చిన్న‌జీయ‌ర్‌స్వామి, ఈవో డాక్ట‌ర్ కెఎస్ జ‌వ‌హ‌ర్‌రెడ్డి, పార్ల‌మెంట్‌ స‌భ్యులు వేమిరెడ్డి ప్ర‌భాక‌ర్‌రెడ్డి, అద‌న‌పు ఈవో ఎ.వి.ధ‌ర్మారెడ్డి, బోర్డు స‌భ్యులు డి.పి.అనంత‌, వేమిరెడ్డి ప్ర‌శాంతి రెడ్డి, చిప్ప‌గిరి ప్ర‌సాద్‌, గోవింద‌హ‌రి, సివిఎస్వో గోపినాథ్ జెట్టి, చీఫ్ ఇంజినీర్ ర‌మేష్‌రెడ్డి, ఆల‌య ప్ర‌ధానార్చ‌కుల్లో ఒక‌రైన వేణుగోపాల దీక్షితులు, ఆల‌‌య డెప్యూటీ ఈవో హ‌రీంద్ర‌నాథ్‌, ఇత‌ర అధికారులు పాల్గొన్నారు. కాగా.. న‌వ‌రాత్రి బ్రహ్మోత్సవాలలో మూడో రోజైన ఆది‌‌వారం ఉదయం 9 గంటలకు సింహవాహనం, రాత్రి 7 గంటలకు ముత్యపు పందిరి వాహనంపై మలయప్పస్వామి వారు ద‌ర్శ‌నం ఇవ్వ‌నున్నారు.

 

Just In...