Published On: Sat, Aug 17th, 2019

జలదిగ్బంధంలో భవానీ ద్వీపం…

సెల్ఐటి న్యూస్, విజయవాడ: ప్రకాశం బ్యారేజీలోకి పోటెత్తిన వరద భవానీ ద్వీపాన్ని ముంచేసింది. ద్వీపంలో ఐదు అడుగుల మేర వరద నీరు చేరింది. పర్యాటకాభివృద్ధి సంస్థ (ఏపీటీడీసీ) విజయవాడ డివిజన్‌కు కృష్ణా వరద కోట్లాది రూపాయల నష్టాన్ని కలిగించింది. మొత్తం 16 కాటేజీలు, 4 ట్రీ టాప్‌ కాటేజీలు, రివర్స్‌ హౌస్‌లు వరదనీటిలో ఉన్నాయి. ఇంకా వరద పెరిగితే కాటేజీలలోకి భారీగా వరద నీరు చేరే అవకాశం ఉంటుంది. ద్వీపంలోని రెండు రెస్టారెంట్లు పూర్తి వరద నీటిలో చిక్కుకు పోయాయి. ఒక రెస్టారెంట్‌ గ్రౌండ్‌ ఫ్లోర్‌లో భవానీ ద్వీపం యూనిట్‌ మేనేజర్‌ కార్యాలయం ఉంది. అది పూర్తిగా నీట మునిగింది. రోబోటిక్‌ పార్క్‌ పూర్తిగా మునిగిపోయింది. రొబోటిక్‌ యానిమల్స్‌ అన్నీ వరదగర్భంలోనే ఉన్నాయి. మేజ్‌ గార్డెన్‌, రోజ్‌ గార్డెన్‌లు కూడా మునిగిపోయాయి. గేమింగ్‌ జోన్‌ గ్రౌండ్‌ ఫ్లోర్‌ పూర్తిగా మునిగిపోవటంతో అందులోని వీడియోగేమ్స్‌ అన్నీ వరదల నీటిలోనే చిక్కుకు పోయాయి. కృష్ణానదిలో రూ. 16 కోట్ల వ్యయంతో ఏర్పాటు చేసిన లేజర్‌ అండ్‌ మ్యూజికల్‌ ఫౌంటెయిన్‌ను తాళ్ళతో కట్టి ఉంచారు. ఇది కొట్టుకుపోతే మాత్రం భారీ నష్టం సంభవించే అవకాశం ఉంటుంది. కొంత కాలం కిందట భవానీ ద్వీపం చుట్టూ ఐరన్‌ ప్లేట్‌ ఫిల్లింగ్‌ చేయించారు. పరిస్థితి ఎలా ఉంటుందో వరదలు తగ్గిన తర్వాతే తెలుస్తుంది. భారీగా ఇసుక మేటలు ద్వీపాన్ని చుట్టేసే ప్రమాదం కనిపిస్తోంది. భవానీపురంలో కృష్ణానది ఒడ్డున హరిత బెర్మ్‌ పార్క్‌ పరిస్తితి కూడా దారుణంగానే ఉంది. కృష్ణానదికి వరద ఉదృతంగా రావటంతో.. వరద మొత్తం లాన్‌ను దాటి కాటేజీల వరకు వచ్చింది. బోటింగ్‌ యూనిట్‌ కార్యాలయంలోకి నీళ్ళు వచ్చాయి. బోట్లు కొట్టుకు పోకుండా బలమైన రోప్‌లతో కట్టివేశారు. లాన్‌ మొత్తం వరదనీటిలో మునిగిపోయింది. పాత్‌వేలు, అంతర్గత రోడ్లలోకి పెద్ద ఎత్తున వరద నీరు చేరింది. పార్కింగ్‌ వరకు కూడా వరదతో మునిగిపోయింది. వరద ప్రభావం కారణంగా భవానీ ద్వీపం, హరిత బెర్మ్‌పార్క్‌లు మునిగిపోవటంతో పర్యాటక శాఖ ఎండీ ప్రవీణ్‌కుమార్‌ శుక్రవారం పరిశీలించారు. భవానీద్వీపం లోపలికి వెళ్ళటానికి అవకాశం లేకుండా పోయింది. హరిత బెర్మ్‌పార్క్‌ ప్రాంతాన్ని ఆయన పరిశీలించారు. ఎట్టి పరిస్థితులలో సందర్శకులను అనుమతించవద్దని యూనిట్‌ మేనేజర్లు శ్రీనివాస్‌, సుధీర్‌లను ఆయన ఆదేశించారు. భవానీ ద్వీపంలో పునరుద్ధరణ పనులు చేపట్టిన తర్వాత. అనుమతించటానికి చర్యలు తీసుకోవాలని ఆదేశించారు.

Just In...